«

»

Окт 23

Мардеj hесте, гардеj ни!

Чымы гирәмијә боон ијән һовон!
Ымруж баhандем бошмә чәмә Сипириш Фәхрәддин Миәллими бәчәмә хәлғи нывыштә овардномә.
Чымы гирәмиjә хәлғ! hәмон ружи ки Әли Нәсири кәфәныш танкарде, омәj бә ғәбыстон, воте «бәjжи бәjжи дәкәндән мыни», иглә hәғиғәт әбәди hәкк бе бәчымы мазги: жыгошә ҹо ромон ни чәмә! Jа бәпе тосә охој идомә быкәмон ым милли-озоди ҹанги, озод быкәмон ыштә хәлғи, jаәнки мәhв быбәмон гыләј хәлғи ғәзинә, ни быбәмон дынjо димо! «Мардеj hесте, гардеj ни!» чәмә озоди ҹанги шуар бино бе hәмон ружику. Сәрәсәjм ки, мардеj hесте, хун hесте бы роәдә. Ки ыштә чәши вәдә мардеj быгәто, хун быгәто, әв бәзне бәрде ым ҹанги. Ки шон-шоhрәт, дәбдәбә, ешаеш бынәво, чокиш әве, әв hич ныво бы ҹанг, чумчыко шон-шоhрәт, дәбдәбә, ешаеш әнҹәх бә одәмон ғысмәт бәбе ки, әвон де ғәләбә бә сә бәжен ым ҹанги, озод бәкарден чәмә хәлғи. Чыjо бешә нәтиҹә игләjе: чанә чәмә хәлғ озод ни, чәнә әмә жиjејдәнимон ыштә сәбәсожә довләт Толышыстонәдә, бәхтәвәр әзыни бе hич гылә толыш!
Хыдо ыштән шоjде ки, чә ружику жыгошә hежо чымы танәдә быә Әли Нәсири и һәзо нәвса нәве семинә сори августә мангәдә танкардә hәмон ә сипиjә кәфән! hич вахти нәвәним бо шоhрәти, ешаеши орзуjәдә быәним. hежо мардем гәтә ыштә чәши вәдә, hозым кардә ыштәни бо hәмон ружи! Бә hичи тамәм быәни, меjлым сәғандәни бы фани дынjо тәнхо, бәчәj дәбдәбә, иглә озодим выжниjә боштә чы дынjо немәтон дыләдә, дә орзуjән hежо жиjәм, ружбәруж, мангбәманг, гәмбәгәм hежо ром кардә озоди сәмтәдә, ыштә дәсто омә hарчим кардә ки, нез быкәм ә рој, озод бывиндым ыштә хәлғи. hич вахти нәвәним бо номи, hежо пиjәме ки, чәмә хәлғ номдор быбу, чәj ыштә ном быбу дынjо хәлғон дыләдә. Чичым кардәбу, боштә хәлғим кардә. Бы висты пенҹ сори дыләдә hичим кардәни нә боштә ыштәни, нә боштә ов-авлоди, нә боштә хыjзони, нәәнки боштә зоон, hарчим кардә боштә хәлғи.
Мыкофотым чич быә! Бә вахти де Әли Нәсири шәбимон бә Рәзго – бәчәмә билә Умидвари вәjә. «Урусә-толышә луғәт»-ым хәләт бардәбе боәj. Ноәшбе ыштә мизисә, ныштәбе вәjә чодыәдә. Гыләј нуперәсә зоә омәj, пегәтыше ә китоб, мачыш карде, ноше ыштә чәшонсә. Чәjо и кәси вотыше бәj: «Зә, ахмәх, Ғырон ни ә китоб, бочи мәч кардејдәш?». «Чәмә ғырон hежо ым китобе!» — вотыше ә нуперәсә зоә, там-тамижә ше ныште ыштә вырәдә.
Ән jолә мыкофотым зынәј боштә чә зоә hәмон әмәл!
Ымружнә ружәдә аз виндеәдә ки, hәзо-hәзо толышон рост быән сәпо, тәләб кардејдән чымы озоди, чымисә jолә мыкофот әзыни бе бомы! Чумчыко чәвон hәр гыләjни hәхи сәдо hәниjән нез кардејдә чәмә хәлғи озоди ружи! Одәмон жыгонә хәлғ бејдән, хәлғ жыгонә озод кардејдә ыштәни, сыбут кардејдә ки, озоди дамејдә бәj!
Чымы шәhидә боә Акиф hежо әвоти бәмы ки, «ғәhрәмонәти ни бә зиндон дәше! Ғәhрәмон ә зоә ни ки, әв дәшејдә бә зиндон. Ғәhрәмон ә зоәjе ки, әj дәноj зынејдәнин бә зиндон»!
Чымы рукә боән быбо, hежо гушовәм кардә ыштә гушонәдә чәј вотә ә сыхәнон. Әве, быдә hички бәштә ағылән нывә ки, зиндонәдә ныште ғәhрәмонәти зынедәм боштә! Ғәhрәмон аз ним! Ғәhрәмон ә толышә балонин ки, дәстәк дојдән бәмы ымружнә ружәдә, чымы hәвари кәшејдән, демиjән ыштә хәлғи ғырjәти кәшејдән! Ғәhрәмон әвонин, ешғ быбу бәвон! Чыми дустәғәти гыләј дәвинәjе hәм бочымы ыштәни, hәмән бочәмә хәлғи! Әмә hәмсәjәво, иминә нубәдә әз ыштән бәпе ыштә дасто омә hарчи быкәмон ки, сәбарз бешәмон чә дәвинәо! Әмә бәпе жәго быкәмон ки, шо ныбу чәмә дышмен! Быдә әв бызны ки, толыш иглә Фәхрәддин Әбосзодә ни, толыш гыләј jолә хәлғе, чәj номыш hесте, чәj ризыш hесте тарыхәдә! Һәзо-һәзо толышон дештә хуни нывыштәшоне ым тарых! Озобижони hукмәт иjән довләт быдә бызнын ки, демы- деәj сә әбыни толышә хәлғ! Әвон быдә бызнын ки, кыште бәзнен әмәни, бә зиндон дәноj бәзнен, әмма арыште нибәзнен, озоди ешғи бекарде нибәзнен чәмә дылоно, окыште нибәзнен чәмә кијон, оһаште нибәзнен чәмә милли-озоди ҹанги! Фәхрәддинон веj быән толыши тәрыхәдә, жыгошә ижән бәбен, иншаллаh бәбен! Иглә Фәхрәддини бә зиндон дәноә Озобижони hукмәт ыштәнән сәрәсејдәни ки, демиjән hәзо-hәзо тожә ҹангәворә толышә зоон иjән кинон бекардејдә бә мәjдон! Толышыстони озоди рәмз – чәмә сыә Пәрчәм етибоjнә дастонәдәj, әве, мардеj hесте, гардеj ни!
Чымы хосә хәлғ! Быдә hич гылә толыш жыго думот ныкә ки, демиjән мы ыштә мардем гәтә ыштә чәши вәдә! Не! Пиjо нывыштәме ки, бы висты пенҹ сори дыләдә бе ым зиндонијән мардеj hежо чымы чәши вәдә быә, сипиjә кәфән hежо чымы танәдә быә! Әмма ымиjән бызнән ки, зиндон мыни тәслим әзыни карде бә мәрде! Ым hәми hәлә веj ов бәбарде, быми шәкон ныбу! Ымружнә ружәдә hәғиғәт ыме ки, зиндонәдә ныште-ныште, hәниjән веj певәшејдә чымы дыләдә вәшә озоди иjән ҹанги ешғ! Аз шымәни гыләј мырхут виндејдәм, ымән илhом дојдә бәмы! Әве, hич нороhәт мәбән чымыку, hич гылә зиндон арыште нибәзне мыни! Чанә ки чәмә хәлғ де озоди ешғи жиjејдә, дышмен арыште нибәзне әмәни!
Озоди сәдо кардедәj әмәни! Мардеj hесте, гардеj ни бы роәдә!
Фәхрәддин Әбосзодә

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>