«

»

Окт 16

Фәхрәддин Әбосзодә ермәније?

Чымы гирәмијә боон ијән һовон!
Шымә јәғын зынедәшон ки, Москвә вилојәти Лјубертсы рајони мәһкәмә Фәхрәддин Әбосзодә зиндондә огәте мыддәт бә пенҹ манг дыроз кардыше — јәни та ды һәзо нонзәминә сори мартә манги шәши.
Ым һәлбәттә бәмә ве гон омејдә. Иглә Устод Фәхрәдини зиндонәдә манде гон омејдәни, чыми бо әј әһәмијәтыш каме, әв ҹисмән конҹо бедәбу быбу, метафизик сәвијәдә һежо ыштә зәминәдәј, Толышыстонәдәј, Вәтәнәдәј. Мәкони ијән вахти чәрчивон бо бы дәрәҹә ијән сәвијәдә быә оныгынијә мыборизи һичије! Чәј там гыввәдә офәје имканику мәһрум бе, информасијә мәнбонку мәһрум бе, дештә хәлғи, дештә һәмфикрон интерактив әлоғәку мәһрум бе гон омејдә. Әмма ымән мысибәт ни! Фәхрәддин миәллим ијоән јәғын гыләј ро пәјдо бакај: коғәз ијән ғәләмыш һесте, јәни ыштә фикрон нывыште имконышән һесте. Нави виндәкәси тәбијәт ки чәјку һесте бәј имкон дојдә ки әв чәј дастәдә минимум информасијә беәдән быәјон бәрпо быкеј.
Тутчеви «Русијә де ағли фаме нибәбе» мисра бомыно һежо чочин омедәбе. Ысә мы жыбызын мәнош чиче гәдә-гәдә бәсәдәшедәм.
Чокнә бедә ки уруси дығлә сыхан нызнә памәдор-тәрәвәз һаватә тырк Русијә вәтәндошәти жыбызын де сејринә чулә ғыввә сәјдә, әмма Фәхрәддин миәллим чанд соре әј сәј зынедәни. Һәлә канә Шура кешвәри ҹурбәҹурә кәноә выронку чанд гылә шупәјнә, һәтто бәзән һәгиги бандитон сәшоне Русијә вәтәндошәти, — кејнә пијәшонбе сәшонбе! Ијо исә бә Русијә идејә вәфодор быә кәләнтәрә алим! Бәј ым вәтәндошәти доеку чанд соре де чымисә чокә вырәдә око дое әби думојәндыәти сәнибәтон-сәнибәтон бесәбәб имтино кардедән. Дојдәнин — вәссәлом!
Бәле, әмә бә Русијә мыһути ғәрибәтијон пемужијәмон. Әмма сыхани рости һич чәш кардедәныбимон ки, сывој ҹо чијон Русијә чәј мәрағон мыдофијә кардә одәмон думоән ебәгыније. Озобојҹон номәдә де гыләј ғынокорә ијән антирусијә довләти гынокорә һукмәти ехроҹә сифориши дынјоәдә мәһшур алими бә зиндон дәное бә һич чәрчивә дәғанде әбыни. Нәһојәт, сыхан ым ко һугуги тәфәрруоти барәдә шедәбу әгәр, гыләј хәлғи лидери, јолә һуманисти бә зиндон дәное не, кешвәри тәрк ныкарде коғәзи имзо карде әби јаән лап бевәҹә һолдә кәдә егәте әби.
Бәле, чымы гирәмијә боон ијән һовон, мы һәјғәтән гәдә-гәдә бәсәдәшедәм, Тутчеви «Русијә де ағли фаме нибәбе» сыханон мәно… Әмма мы ым фикри жыго дыроз әкејм: «Русијә де ағли фаме нибәбе, һич ҹәһд кардејән лозим ни, чумчыко дәбәгижијеж».
Чокнә бедәбу быбу, мы чыми барәдә гәп жәј пиједәмныбе, Фәхрәддин Әбосзодә һәхәдә тыркон арәдә певыло кардә быә гуја Устоди дискредитасијә кардә примитив мифон барәдә гәј жәј пиједәмбе. Толышон дыләдә һәватә быә ғәрәзкорон Устоди гәте горош шој-војәти карде һәлә бынәмон бә кәно. Һәлбәттә, әвон ды-се кәсин. Әмма әвон һестин. Әмә чәвон номон зынедәмон. Тарыхи вәдә әвон ыштә ҹәвоби һукмән бәдон! Жыгоје ки, ыштәни телеастовә зынә гыләј кәмсводә һозијә одәм бы незони һәто жыго вотыше ки, Фәхрәддини бә Боку тәһвил быдон чок бәбе. Быдә ым Боку агентон бымандын бә кәно. Боән мифологијә һәхәдә сыхан быкәмон! Дешменон Әбосзодә һәхәдә кардә гәпон әсос елемонтондә гыләј гуја чәј әслијәт, рәғ-ришә ермәни беје. Бешубһә, Фәхрәддин Әбосзодә толышә-ермәнијә дустијәти тәрәфдорондә гыләјније, де Ермәнистони иттифоғи идејә толышә сијоси фикри гыләј елемәнт кардыше. Әв Ғәрәбоғ, јәни Артсахи, иглә ермәнијон ијән Ермәнистони мәсәлә не, һич ныбу әнән һәм Толыши миллијә-озоди һәрәкоти мәркәзәдә быә толышонән мәсәлә бе барәдә сыхани мыәллиф әве охо.
Јәни ым Фәхрәддин Әбосзодә ермәни бе мәно дојдә? Јаән һич ныбу ермәнијә сијосәти жијәдә бе нишон дојдә? Һәлбәттә ки, не. Чумчыко Устод чич кардедәбу быкеј, чич нывыштедә бынывышты, ыштә жимони бә чичи һәср кардә, — чәвон һәммәј иглә лејтмотивыш һесте — чәј толышә хәлғи мәрағон. Һәтто чәј шәхси жимон, чәј хејзони
жимон, роһәтәти ијән камфорт — һарчи ым дәјишныбә принсипи табејәтиәдә мандедә. Бо Фәхрәддин Әбосзодә милләти мәрағон, чәмә хәлғи мәрағон һарчијсә бәпеје.
Чәмә лидери характеристикә кардеро ым әсос принсипи пегәтејәдә, чәј бә ермәнијон ијән Ғәрәбоғи мәсәлә хысуси мыносибәтијән толышә хәлғи мәрағон чәрчивәдә тәһлил карде лозиме. Бәле, бәнә бәштә доғмә зәмини, доғмә тарых ијән мәдәнијәти де һәзо гылә тери ангыл быә гыләј һәгиги бандыжи, һәгиги ликыжи, бәнә гыләј шаири, әнывышти ијән мытәфәккири Фәхрәддин Әбосзодә һәлбәттә ки симпатијәш һесте бә де чәмә хәлғи де һәзо сорон ивырәдә жијә, һәзо гылә авлодә әлоғоныш — һәм генетик, һәм мәдәни әлоғоныш быә региони автохтонон. Чәј сывој симпатијә ијән дустијәти ҹо мыносибәтыш бе нибәзне бә ермәнијон, ләзгијон, гурҹијон, татон, аварон. Ҹо ҹурә чокнә бе бәзне ки: Ҹәнуби Ғәфғази автохтонон хунинә бывонин — толышон, ермәнијон, ләзгијонән чәвон дыләдә… Чәј мығобиләдә чәмә Устод омә ишғоләвонон агрессив тәбијәти ғәбул кардедәни, чәвон һостонә ғәзәнҹә тәши ијән ҹо кәси зәмини, тарыхи, мәдәнијәти ыштәнки карде хосјәтән… Ҹо ҹурә бе бәзне? Бәштә хәлғи озоди идејә дештә ҹони ијән бәдәни һар һиссә банд быә миллијә хадим бә омә ишғоләвонон тәрәф ҹо емосијон һис карде бәзне?!
Чымы гирәмијон, шымә жыго зынедәшон ки Озобојҹони агитпроп ымони зынедәни? Зынедә, ве чок зынедә! Фәхрәддин Әбосзодә халис толыш, деғыж, һәгиги ҹангәвон бе һар кәс зынедә. Ым сыр ни, һич кәс быми шубһә кардедәни!
Озобојҹоныжә блогондә бә Миәллими тәрәф вотәбыә «иттиһомон» — гуја әв ермәније — иглә мәғсәдыш һесте: толышә-ермәнијә дешменәти роскардеје: јәни ермәнијон бывотын ки «Әбосзодә кије ки ермәни быбу?!», толышон исә бывотон ки «Шымә чокнәј ҹурәт кардедәшон ки бә чәмә лидери ермәни вотедәшон!?» Әмма әсләдә реаксијә әкс истиғомәтдә беше! Ермәнијон нывыштышоне: «Бо әмәно фәхрә ки, бәнә Фәхрәддин Әбосзодә гыләј әмәни тәмсилкардәкәсымон һесте!», толышон исә ыштә тәрәфо ым фактори ыштә лидери симоәдә һич релевант бе ғејдышон ныкарде: «Һа чич бәбе ки! Әв ермәни быбуән чы фәрғыш һесте! Ыштә жимони бә чәмә хәлғи озод карде һәср кардәбу, әв чәмә лидере».
Јәни чәмә хәлғ дәгиг бәсәдәшеше тыркон нывыштәкәсон ым провокативә иддодә быә тәлә. Ым толышон ијән ермәнијон дыләдә быә сијоси-ичтимои фикри јолә сәвијәдә бе нишо дојдә. Чымы шинә боон ијән һовон, ым јолә које! Довләт ијән јолә мәдәнијәт сојб быә ермәнијонку ичтимоји-сијоси фикри јолә сәвијәдә мы зынедәбим, әмма чәмәнән, јәни довләтышон ныбыә ијән чыркинә тыркә зылмәтәдә мандә толышонән жыго ичтимоји-сијоси сәвијәдә бе бомыно гыләј кәшф бе. Мы ве хошбәхтим!
Бы сәмтәдә мы охонә вахтонәдә һәм чәмә Һәрәкоти ҹывонә кәши актив шикләдә рә-рә росбе ғејдым карде. Ҹывонон, хысусән зоон, икәрәдә ыштә хәлғи тарых ијән мәдәнијәти певыло кардеәдә анә актив бин ки, тәәҹуб кардедыме. Демијәын жыго нә тыркон тәрәфо быә әзјотонку тарседән, нәән һар дәјғә бә «боәти ијән вәһдәти» — һәлбәттә боәти ијән вәһдәт чәвон шубһәјнә вариантәдә — дәвәт кардә тыркә дујә елитә тәрәфо быә шинә танәку. Устод Фәхрәддин рә-рә вотедә ки: «чәмә һырдәнон меһмонон вәдә ыштә зывонәдә шерон һандеәдә, чәмә ҹывонә зоон һич гылә шәхси мәгсәд ныбе-ныбе ыштәни бәштә хәлғи аид бе тәсдығ кардеәдә, бызынән ки, әмә галиб бимон! Жыго чиједә ки, әмә һәни галиб быәмон!».
«Зынедәним, — вотедә Миәллим, — Толышыстони Республикә сохтә чанә вахт бәсте, әмма дәгиг бызынән ки, пештыпур быбән ки, Толышыстон чәмә хәлғи сәондә ијән дылондә һәни сохтә быә, әј һәни моле әбыни!».
Мы ымони һәммәј һәни ғејд кардедәм, әмәнән ымони рә-рә нишо дојдәмон чәмә «Толышыстони вәомәј» рубрикәдә: ыштә зывонәдә шер һандә әғылон, актив быә ҹывонон ијән ҹо чијон. Чәмә әнывышт Нәриман Толыши гәдә нәвә чымы дыли хысусән нам кардедә, — тожә-тожә һәлә сыхан карде умутедә, әмма һәни ыштән инә зывонәдә шерон вотедә… Чымондә гыләј соф-ожә мисалән бы незони сосијал шәбәкон толышә сегментәдә Кәрим Сепаратист номәдә гыләј блогери бешеје. Навнә бәрномәдә әмә чәј роликондә гыләјни нишомон дое. Бы бәрномәдә әмә ым оныгынијә ҹигәјнә ҹывони ијән һәни сијоси
хадими дыглә тожә ролики нишо бәдомон. Мы бә чәј сәводинә, мынтәзәмә, әсосинә гәпон гуш доеәдә шо бедәм. Чәмә ҹывонон јолбе виндеәдә чымы дыл де фәхарәти пур бедә. Кәрим Сепаратисти симоәдә мы чәмә хәлғи вәомәј виндедәм.
Кәрим ијән Кәрим тәки әғылон навәдә толышә хәлғи миллијә һестемони әсосәдә бәбен.
Мы умдәвом ки, Кәрим Сепаратист чыми бәпештән жыго актив шикләдә сосијал шәбәкондә ыштә кој идомә бакај, тожә мывзујон пәјдо бакај ијән тәҹрубә гырдә карде-карде, тикијән әсосин, тикијән ашиш вәтәнпәрвәрә идеологијә певыло бакај һәм ыштә һәмсиннијон арәдә, һәмән јолон арәдә. Шымә бә чәмә ҹывонә гәһрәмони роликон дијә быкән.
Дыми мы бәшмә сәғби вотедәм, чымы гирәмијон!
Бә чәмә Устод Фәхрәддин Әбосзодә озодәти!
Быжијы Толышыстон!
Быжијы ТМВ!

Лејла Додо

Источник:https://www.youtube.com/watch?time_continue=12&v=2U9N8KeO8k4

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>