«

»

Окт 16

Жимони дәвинә, ҹанги дәвинә

Чымы гирәмијә боон ијән һовон!
Вотедән ки, чәмә жимон ыштән гылә дәвинәjе, имтоhоне. Хәлләғи- Әләм офәjедә одәми ки, дәвинә быкә әj, имтоhоно дәвоны. Әғиләти вәхтонәдә чәмә әзjәти чәмә пыә-моә кәшедә, де обрәзи бывотомон, чәмә имтоhони доәкәс әвон бедән. Әммә бә hәдди-булу рәсә ружику hәр гылә одәм ыштән доjдә ыштә имтоhони. Ым дәвинон идомә карденән тосә мәрдә ружи. Одәм ки огәрдедә бәштә Хыдо hузур, әjо мәлум бедә ки, әв чокнә жиjә, дәвинәо дәвәрдә ja не, Хыдо имтоhони доj зынә jә не. Быми вотедән “Жимони дәвинә”. Чә дәвинә нәтиҹә әв бедә ки, hәр кәс ғәзәнҹ кардедә ыштә ә дынjо, jәне jә жиjедә вәjштәдә, jәәнки әбәди сутедә ҹәhәнными отәшәдә.
Сывоj ыми, жыго гылә ифодән hесте. Вотедән ки, жимон гылә ҹанге. Чыми мәно ыме ки, одәм бә дынjо дим омә ружику тосә мәрде hежо ҹанг кардедә, мыборизә бардедә. hәр кәс ым ҹанги бардедә hәм дештә ыштәни, hәм де тәбиәти, hәмән де ҹо одәмон.
Чымы гирәмиjон! Бы вырәдә пәрсе бәзнешон ки, Леjлә Додо, ым чы сыхәне, одәм чокнә ҹанг бәзне карде дештә ыштәни?
hә чымы әзизон, тикәjән нығыл- нығыли нәзәр сәғәндошон, бәвәдә бәзнешон ки, ҹанги jолә гылә одәм дештә ыштәни бардедә. Чумчыко hәр гылә одәми hестыше ағыл, hәмән hәр кәси дыләдә hесте нәфс. Одәм дештә ағыли фәмедә ки, Хыдо офәjәше әв, чәjоән ро-риjәш ноә боәj. Ым ро-риjәш нывыште ыштә китобонәдә, чәjоән вығәндәше Пеjғәмбәрон, әвон чок-чоки сәросниjәшоне одәмон ки, чиче чы Хыдо ноә ро-риja мәно иjән молjәт? Әвони дештә ағыли фәмә инсон сәрәседә ки, hәммәjсә чокә жимон чы Хыдо ноә ро-риjә кәрдә жимоне. Чумчыко жәго жимон әбәди вәjшт вәд кардедә бә инсони.
Интәси одәми дыләдә ныштә нәфс hежo дәгижнедә әj, роо бекардедә, әj вәдәр кардедә бә ҹурбәҹурә мырдолә әмәлон. Жыгонә, одәми ағыл hежо ҹанг кардедә дечәj нәфси, ағыл бардедә әj бә hәхи ро, нәфс шыкырнедә әй бә гыно.
Есән ды –се кәлимә бывотым инсони бардә ҹо ҹангон hәхәдә. Одәм бә дынjо дим ғәдәм ноә ружику ҹанг кардедә де тәбиәти. Сәзд бедә, оләт тәнкардедә. Тәши гәтедә, нәведә бо пешомә ови. Жимон кардеро кә ежедә бәштә.
Ым просеси hәниjән чок бәштә чәши вә бардеро, боән бәштә jод биjәмон чәмә сәрзәмин Толышстони. Тәсәввур быкән ки, веj hәзо сорон чыми бәнәв чәмә сәрзәмин вишонбин иjән бәндон. Ружон ружони Хыдо хәлғ кәрдыше бә зәминәдә Дәдә Толыши. Әj тәмиз кардыше зәмин сығонку, овдонә кардыше ым зәмин бо жимони. Әj кә ежәше боштә бы зәминәдә, чәjоән hәмулыш карде мол-мәлә, чәвон шытыш пешомәj, гуждыш hарде. Чәj бәпештән Дәдә Толыш кәштыгыл кардыше бы зәминәдә, әғылыш певәте. Жыгонә иглә мерди пешто омә әғылон де фәтхәши бә хәлғ огәрдин, хәлғ бин. Бәмә вотышоне толышә хәлғ.
Интәси деми сә ныбе Дәдә Толыши де тәбиәти бардә ҹанг. Ҹо одәмон иjән хәлғон виндышоне ым овдонә зәмин, пиjәшоне гәтым быкән әj, ыштән быжиjын бы зәминәдә. Әве, Дәдә Толыши хәлғ мәҹбур мәнде ки, ҹанг быкә деjәвон, jәне ыштә сәрзәмини hәвәри быкәшын. Де минволи hәзо сорон дәвәрдин, әммә чәмә дәдәбобон нығошон доj ым зәмин, толышә хәлғ озәвзиjәj ыштә сәрзәминәдә. Ым хәлғи гылә jолә мәдәниjәтыш сохтә бы зәминәдә, гәпыш жәj, hәндыше ыштә шинә-шәкә Инә зывонәдә – толышә зывонәдә, әрмәғоныш карде ым сәрзәмин иjән ым зывон боәмә.
Чымы гирәмиjон! Әве әз hежо бәшмә вотедәм ки, чәмә сәрзәмин Толышыстон, чәмә толышә хәлғ иjән чәмә толышә зывон чәмә дәдә-бобон әмонәте, чәмә вәзифә hәмон әмонәтон бәнә чәши гыли нығо доje.Әмә бәпе нығо быдәмон әвони. Әмә бәпе хәjонәт ныкәмон бә әмонәти, әj быдәмон бәштә нәвә-нәтиҹон. Жыго быкомон, бәвәдә огәте бәзнемон hәм ыштә сәрзәмини, hәм ыштә хәлғи, hәмән ыштә зывони!
Ымон hәммәj ҹангин, чымы гирәмиjон. Әмә ҹанг ныкомон, hәрчи гин бәкардемон. Чәмә хәлғ вотедә ки, әштә кәлә сил бәкарде ныштә кәлә сәпе! Чыми мәно ыме ки, гирәм әмә ҹанг ныкомон, ыштә сәрзәмини, ыштә хәлғи, ыштә зывони ғырjәти ныкәшомон, бәвәдә гин бәкардемон әвони hәммәj. Демиjән, дәвәрде нибәзнемон ҹанги дәвинәо. Гирәм бә jод биjәмон ки, чәмә жимон ыштән гылә ҹанге, бәвәдә мәлум бедә ки, демиjән әмә дәвәрде нибәзнемон жимони дәвинәо!
Әве, бә чәндә сорон дырози әмә вотедәмон бәштә гирәмиjә толышон ки, ҹанг ныкомон, бәвәдә дәсто бәше чәмә сәрзәмин, мәhв бәбе чәмә зывон, мәhв бәбе чәмә хәлғ.
Есән боән бунәмон, чәмә толышон чокнә hәj доjдән бәчәмә сәдо, чокнә ҹанг кардедән ыштә сәрзәмини, ыштә зывони иjән ыштә хәлғи роәдә?
Hәлбәттә, әмә веj шомон ки, ружбәруж hәниjән веjә толышон умуж гынедән бәчәмә бардә милли-озоди ҹанги. Ше-ше веj толышон сәрәседән ки, бы песохтә hәромзодә Озобижони тәркибәдә бымәндомон, бәвәдә мәhв бәбе чәмә зывонән, чәмә хәлғән.
Әммә де дыләдожи бә гиj гәтедәм ки, hәлә кәли толышон нез мәндедәнин быми. Кәли толышон тәрседән ыштә ҹонику. Толышон hестин ки, тәрседән ыштә молику. Hестин жәго толышон ки, оҹизин, hичи омедәни чәвон дәсто. Jәлтәғә толышонән hестин ки, чәвон ко сәнәт бә тыркон jәлтәғәти кардеjе. Әвон шәв-руж дод-әмон кардедән ки, әмони руже, ҹо мәбәмон тырконку, jодо бекәәмон ыштә зывони, гәп быжәнәмон тыркә зывонәдә, нокәти быкәмон бә Озобижони довләти. Жыгонә, hәр ҹурә толышән hестин. Әмә шәв руж но-пегәт кардедәмон ки, чокнә бекәмон ым тәрси жәләвонә толышон ҹоно, ҹәлб быкәмон әвоно бә толыши милли-озоди ҹанг?
Чымы әзизон! hәр гылә хәлғи милли-озоди ҹанги тәрыхәдә жыго hодисон бедән ки, әди вәхтонәдә бә дә сор карде мымкун ныбыә гылә jолә ко кырт гылә вәхти дыләдә мымкун бедә. Шымә чок зынедәшон ки, чәмә сипириш Фәхрәддин Әбосзодә есә зиндонәдә. Иjо мы
вотем пиjедәни ки, зиндонәдә бе чокә коjе. hәлбәттә, чокә ко ни, хысусән бо сининә одәми. Интәси чымы мәғсәд иjо чәj дустәгәти hәхәдә гәп жә ни. Чымы мәғсәд hәзо-hәзо толышон бы ғәзиjә доә реәксиjә hәхәдә гәп жәjе. Кырт гылә вәхти дыләдә hәзо-hәзо толышон ибердәмә рост бин сәпо, дәмәндин бочәмә сипириши hәвәри кәше. Тосә зинә ружи чәндә гылә толышон гәвомәj вотедәбин иjән нывыштедәбин чәмә сипириши hәхәдә. Әммә чә ғәзиjә бәпештә бәнә мырхути и бин бо ҹанг карде чәj роәдә. Әз чок сәрәседәм ки, чә ҹанги әсос мәғсәд иглә чәмә сипириш ни, мәғсәд чәмә толышә хәлғе. Әве әз вотедәм ки, ымружнә ружәдә чәмә сипириши hәвәри кәшә hәр гылә толыш, демиjән, чәмә хәлғи роәдә ҹанг кардедә.
Иншаллаh, әмә hәммәj умдәвомон ки, чәмә бардә ым ҹанг hәдәр нибәше, чәмә сипириш озод бәбе зиндоно, демиjән чәмә хәлғи дышменон ку-пәшимон бәбен. hәмән умдәвомон ки, жыгошә чәмә бардә милли-озоди ҹанг демиjән овҹ бәкарде, чәмә толышон бәнә мырхути и вырәдә де овәнди бә сә бәроснен ым ҹанги. Чыми нәтиҹә әв бәбе ки, чәмә хәлғ озод бәбе Озобижони зылмику, бәсохте ыштә сәбәсожә довләти, бәхтәвәр-бәхтәвәри бәжиjе ыштә довләтәдә.
Сәломәт бымандән!
Быжиjы чәмә озодпәрвәрә толышә хәлғ!
Быжиjы сәбәсожә Толышстон!
Быжиjы ТМТ!

Лејла Додо

Источник:https://www.youtube.com/watch?time_continue=4&v=VT1wRa7jVtQ

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>