«

»

Сен 21

Чымы гирәмијә боон ијән һовон!

Ды һәфтәје ки, чәмә Устод Фәхрәддин Әбосзодә Москвәдә зиндондә ыштә мәсәлә һәлли чәш кардедә — ја әј бо Озобојҹон тәһвил бәдон јаән озод бакан, чәј пештән Русијә Федерасијә вәтондошәти бәдон. Әмә, һәлбәттә, пештпуримон ки дыминә гылә бәбе, чумчыко Толыши Миллијә Озодәти Һәрәкоти лидери бә Озобојҹони тәһвил дое ыштән ыштәндә мымкун ни, әнәтовә које. Чәмә быми һич шубһәмон ни!
Чәмә лидери гәте, ыштән бәштә драматик быбуән, Толыши һәрәкотдә бә һәгиги вәзијәти бә дынјош окарде. Толыши ҹәмијәтдә, пиједә Толышыстони ыштәндә быбу, јаән чәј хариҹәдә, чанә номинә одәм һестебу, сијоси сәчынонку ијән бә толыши мәсәлә нәзәронку сәрбәст, һәммәј и бән ваһидә мәғсәди әтрофдә — хылос быкән ыштә милләти лидери, ә одәми, ки һәммәј толышон тале чәјку бәшыкырәје.
Ым ве нымунәјнәје ијән шо ныкарде нибәзне әмәни.
Жыгоје ки, Русијә толышә диаспорә рәис, Русијә Федерасијә президенти тоно шура узв Исмојыл Шабанов, Толышә-Мығонә Мухтарә Республикә президент Әләкрәм Һуммәтзодә, Толышпреси сәр редактор ијән Толыши мәдәнијәти ростбемонә фонди рәис Каһин Мирзәлизодә, Толыши Миллијә Академијә иҹроәкә мудир Камал Зылфијев бә Русијә Федерасијә президенти В.В. Путини ијән ҹо инстансијон нывыштәбә ыштә овардномондә Фәхрәддин Әбосзодә сијоси екстрадисијә ро дој ныбә ко бе ғејдышон карде, толыши-уруси мыносибәтон ғојм кардеәдә ијән толышон руспәрәстә оријентасијә тумо кардеәдә чәј ве јолә ролыш бе нышонышон дое. Һәммәј кутләви информасијә воситон, һәммәј сосијал шәбәкон де Фәхрәддин Әбосзодә һәхәдә бә хәбон пурин. Фәхрәддин Әбосзодә һәгиги јоләти ијән әһәмијәти ым нишоныш карде ки чәмә Устоди мыдофијәро иглә бәј хунәдә доғмә бә толышон не, Озобојҹони ҹо автохтонә хәлғон — ләзгијон, аварон ијән татонән росбин. Русијә, Ермәнистони ијән Ирони интеллигенсијә, сијосәтмәдорон ијән ичтимаи хадимонән ыштә сәдошон роскарде. Жыго, мәсәлән, Ғәфғази геосијосијә клуби котиб-координатор Јана Амелина ғејдыш карде: «Чанә ки һуғуғә довләт бә Русијә сијоси сәбәбонку тәғиб кардәбә одәмон тәһвил дое нибәзне, әсосымон һесте ки жыго фик быкәмон ки, Луберсы мәһкәмә ғәрор ләғв бәбе, Фәхрәддин Әбосзодә озод бәбе ијән Русијә вәтәндошәти бәсте ијән әј бә Озобојҹон тәһвил дое мәсәлә ружонәку гырд бебәше. Бы мәсәләдә сәһв вадое бә Русијә милли мәрағон һәм даһилдә һәм хариҹдә зијон бавај ијән озобојҹонпәрәстә лобби ғәләбә ләз бәбе, ә лобби ки Әбосзодә әвони фошкардеро әнә вахт ијән зу сәрфыш кардә». Мәһшурә ермәни шәргшынос професор Гарник Асатрјан ыштә нубәдә нывыштедә: «… хысусән ым воҹибе ки, Фәхрәддин Әбосзодә иглә бо Толыши һәрәкоти номинә шәхс ни, әв — чы Озобојҹони һәммәј мәзлумә хәлғон (ләзгијон, аварон, татон…) озоди мыборизә флагмане. Фәхрәддини ни карде ым геносид кардә песохтә довләти тәркибәдә бә бынәјнә хәлғон ружонә жеје».
Ермәни публисит Александр Микаелјан бә Русијә президенти нывыштә ыштә ожә овардемондә нывыштедә: «Әбосзодә програм — сулһи ијән Ғәфғаздә тожә хунинә ҹанги вә гәте программәје. Ым ҹанг бә Русијә дырозә муддәтинә мәроғ ҹәвоб дојдәни. Чәмә алиҹәнобә дусти идеологијә иглә ым маддә бә һар тәрәфинә һурмәт ијән мыннотдәрәти лајиғе».
Чымисә ве, ермәни интеллигенсија бә Ермәнистони премјер-министри овардномәш нывыштә ки әгәр Русијә Федерасијә бә Фәхрәддин Әбосзодә паспорт доеку имтино быко бәј ијән бә чәј хејзони узвон Ермәнистони вәтәндошәти дое быбу, чумчыко бы зори шәхсијәтон бәпе комсә довләт һимојә быкеј.
Сосијал шәбәкон Ирони сегмент де Озобојҹони геносид сијосәти һәхәдә материалон пурин. Әвонән Фәхрәддин Әбосзодә Әлијеви ғысосику бо мыдофијә карде вакардедән.
Бәмы жыго омедә ки, ән тәсиринә чи ҹоје: быәјон фовгәлодә урусә шаири, урусә милләти тәҹәссуми Лидија Степановна Купсова (Бабка Лидка) ҹонәдә ҹәвобыш пәјдо кардә. Ымружнә Русијә — Фәхрәддин Әбосзодә бә зиндон дәноә мәмурон нин, Бабка Лидкаје дештә меһеббәти, мәрһәмәти ијән дывон. Әве толышон бовә кардедән бә Русијсә, ијән чәш кардедән ки бы довләтәдә әдаләт ијән һуманизм ғалиб бомен.
Лидија Степановна бә Устоди шер һәср карде сывој, чәмә јолә шаири рәһмәтдигә Әли Насири бә Әбосодә шестсинәти горош нывыштә мәһшурә «Бум ларзедә әв шеәдә» шери бә уруси пегордонише.
Чымы әзизон, мы ве пиједәмки, чәмә ымружнә ефирәдә бә ым дығлә шериән гуш быдәмон. Мы Әли Насири шери орижинали баһандем, чәмә Ксенија исә Лидија Купсова урусә тәрҹумә ијән чәј ыштән шери баһанде.
Бәрномә орәхәдә бә чәмә лидери гыләјән чыхыши гуш бәдомон.
Быжијы Фәхрәддин Әбосзодә!
Быжијы Сәбәсожә Толышыстон!
Быжијы Толышыстони Миллијә Виндәсәдо!
Лејла Додо

Источник:https://www.youtube.com/watch?time_continue=1664&v=AGHHtZSve9s

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>