«

»

Янв 12

Пешто жәј тырки адәте!

Чымы азизә быјон ијән һовон!
Чымы ымружнә гәп хәјли ғәминә гыләј вағеә һәхәдә бәбе. Шымә зынедәшон ки, манги нонзәдә Русијә Федерасијә Тыркијәдә быә сәфир Андреј Карловышон бә гуллә жә! Иминә нәзәрәдә бә одәми жыго бәзне оме ки, һарчи һәни вотә быә де вағеә әлоғодор. Һәмән тәһғығот шедә вотәјнә, кали кәсон жыго һисоб кардедән ки, һичи зијод әбыни карде бә тосә есә вотәјон.
Бәшмә ыми бывотым ки, чымы ијо мәғсәд бә мерди данымә чә ғәтли пештәдә мандәкәсон, ғәтли тәшкил кардәкәсон ијән бәвон илһам доәкәсон һәхәдә гәп жәј ни. Аз жыго фәрз кардедәм ки, чәтин ки, ым ғәтл чы Тыркијә һукмәти дасти које. Чумчыко есәтнә шәроитәдә сәфири кыште һич сәрф кардедәни бә Тыркијә. Сыфтә гыләј хәбә беше ки, һичмәсә Ислами довләти бәштә гијыш пегәтә ым ғәтыл. Чәјо вотышоне ки, “Ҹәбһә әт-шами” кардәше ым ко. Әмма пешы ә дастон тәкзибышон карде ым хәбон. Жыго мәлум бедә ки, һәнијән јолә ијән ҹидди, бә бејнәлхәлғ терроризми дастәк доә гырд ҹо ғыввон мандән чә вағеә пештәдә.
Чы Русијә аналитикон и поә бы фикәдәј ки, ым ғәтли кардәкәсон гуләнистонин. Әве әвон нәведән ијо бо Әмерикә Ибыә Штатон ангыштә. Кали аналитикон вотедән ки, чы Сәудијә Әрәбистони ко бәзне бе ым вағеә.
Умумән, аз умдәвом ки, рә-ди бегули бәбе ым мәсәлә. Әмма ымружнә ружи һәммәјсә веј әмәни ғәмгин кардә ҹәһәт ыме ки, мардәкәс гыләј чокә одәмбе, әв чокә хыјзонсојббе, чокә пыәбе, ыштә Вәтәни чокә покәвонбе, һәмән ыштә кој устобе, пешәкорбе дипломатијәдә. Мылхәс, Карлов ыштә офәјевонәти ијән пешәкорәти гыләј синәдәбе ки, чәј чандә гылә чокә коон мандин бә нимә!
Чымы азизон! Әве пиједәме ки, шымә дығғәти ҹәлб быкәм бы номердә, мијонгәзә, камфырсәтә, дыздәдәмә ғәтли гыләј символик ҹәһәти, һәнијән дырыст бывотом, бы вағеә молјәти.
Чымы азизон! Есә Русијәдә веј одәмон вотедән ки, чы ғәтли әсос мәғсәд зәрбә жәје бә Русијә-Тыркијә мыносибәтон. Һежо Тыркијәдән ымони вотедән. Әмма дығғәт сәғандән ки, жыго гәпон, бы јоли фаҹиә һич пожәнәтиш ныкарде бә Тыркијә һукмәти ки, әв сәдо быдә Ибыә Милләтон Тәшкилотәдә бә Русијә вәјнә быә ғәтномә леһ! Бә сәнәдәдә нывыштәшоне ки, Крыми мәсәләдә Русијә гәтымкоре, Крымән мывәғғәти гәтә быә зәмине! Чыјо бәшмә жыго омедәни ки, чы Тыркијә һукмәт анән ғысдоғ ни мардә сәфири һәхәдә жәго гәпон жәјәдә?
Жәго сәдонән мәседәмон ки, һичмәсә, сәфири кыште һәнијән нез бәкарде Русијә де Тыркијә, чумчыко ым чәвон дыјнәнән умуми дарде, дардән ки, нез кардедә одәмон ијән довләтон.
Һарчи вотедән бывотын, чымы мәғсәд, пијо вотыме бәшмә, чы ҹинојәти мотивон, чәј тәшкил кардәкәсон һәхәдә гәп жәј фикәдә ним. Веј уму кардәдем ки, чы Русијә ијән Тыркијә сәлоһијәтинә органон каши бә дим бебәкарден, сыбут бәкарден, ки мандә чы ғәтли кутәдә!
Чымы азизгирамијон! Шымә ымијән зынедәшон ки, әмәни, јәне толышон сепаратист һисоб кардедән Озорбојҹонәдә. Һәмән бы вахти әвон око дојдән ым сыхани чәј ән јавә мәноәдә! Чәвон нәзәрәдә сепаратист ә одәмонин ки, әвон мәвотбән һар чијсә бәнав ҹинојәткорин, хәјонәткорин! Сепаратисти кардә ҹинојәти, чәј хәјонәт кардә одәми ки бе воҹиб ни боәвон. Әвон һич дастәвуз, дәлил вардедәнин боштә ым вәрсәғејон исбот кардеро! Әвон иглә ыми карде зынедән ки, аләми һу кардедән бәштә сә, јаһу рост кардедән ки, әмә пиједәмоне ҹо быбәмон Озорбојҹонику. Әвон сәкујә дојдән бәмә ки, һичмәсә, әмә һәммәј һардедәмон Озорбојҹони нуни, чәјоән хәјонәт кардедәмон бәј! Бы вахти әвон и кәлимән вотедәнин ки, чәмәһон һар гыләјни һардедәмон дештә дасти зәһмәти ғәзәнҹ кардә һәлолә нуни, әмма Озорбојҹони нуни һардәкәсон ныштән һукмәти сәдә, әвон кисиб кардедән чы мәмләкәти һәмә мәхлоғи, һәмән чәмә хәлғи! Интаси Әлијеви тәблиғоти машин ыштәни бәнә кужкаги жыго ыштә сәј дәжәнедә бә кул ки, жыбызын, һәни һички виндедәни әвони, хәбәш ни чәвон кардә ҹинојәтонку!
Бочи әмә пиједәмоне озод быбәмон, ҹо быбәмон Озорбојҹонику, бысохтәмон Толышстон номәдә ыштә сәбәсожә довләти? Веј һостоне чы парси ҹәвоб, һа чымы азизә хәлғ! Охо чәмә мәғсәд ыштә хәлғи мардеку перохнијеје! Ҹо һәни чич бәзне бе ијо? Һәмән бы вахти сыхан шедәни иглә чәмә мәдәнијәти, зывони, тарыхи, ыштә хәлғи ыштәнәти һәхәдә, ән јолә мәғсәдымон ыштә хәлғи мардеку перохнијеје! Әмә һисс кардедәмон, виндедәмон ки, жыго бышо, бәмарде чәмә хәлғ. Ым ҹинојәткорә довләт ијән чәј һукмәт һар вахти һозыје ки, ләшғәри быромы чәмә сәпе, ғыр быкә, ғәтымут быкә толышон, ғырәнәми еғанды Толышстонәдә, виронә быкә чәмә хосә Вәтәни! Охо тарыхәдә чандә кәрә быән жыго фаҹион! Камышон ғыр кардә чәмә хәлғ? Әмә чок зынедәмон әвони һәммәј, әве есә рост быәмон бә озоди ҹанг! Чумчыко ҹо ромон ни! Чанә жимон кардедәмон бы довләти тәркибәдә, анән марде хәто елашкијә чәмә сәјсә! Әмә озод ныбомон, деәјән әмәни бәмолен дынјо хәритәо, мәһв бәбе чәмә хәлғ, чәј генофонд, һәни әбыни толыш номәдә гыләј хәлғ, һәни һички гәп нибәже толышә зывонәдә, маһне нибәһанде бы звонәдә, шер нибәвоте бы зывонәдә, нәнон лајла нибәжәнен бы зывонәдә! Мылхәс, чанә тыркон дыләдә быжијомон, анән мәһв бәбемон! Быми шәкон ныбу, һа чымы азизә хәлға! Әвон һар гәмәсә сыбут кардедән ки, дышменин дејәмә, һозын бочәмә хәлғи туми бырније!
Чымы азизон! Чок-чоки фик быдән, чандә кәрә тыркон һуррәҹышон кардә чы бынәјнә хәлғон сәпе, сәросәр тумәбырышон кардә әвон, һежо пијәшоне, тырк быкән әвони! Һәмән жыго ғәзијон иглә Озорбојҹонәдә быәнин, әвон һежо тикрор быән Һајми Ғафғәзәдә, Османи империјәдә, есән Тыркијәдә! Ым кисибкорон кисибышон кардә чә хәлғон кәон, сәшоне чәвон дасто чәвон тәнхо, ғырышон кардә ым хәлғон!
Жыгонә, чымы азизон, әмә чанә рә есијомон оғузә тырконку, анән рә перохне бәзнемон ыштә хәлғи, нығо дој бәзнемон әј бо вәәомә толышон! Чәмә пијәј ыме! Чыми мығобиләдә, чәвон бәмә вотә дыможонон ијән тәһғирон, бәмә ноә ном-ләкон һәммәј корә пәллеки нәғылонин!
Шымә фик быдән, сывој ыми, һәни чичон вотедән бәмә: Вотедән ки, әјом дәгиш быә, һәни висты иминә әсре, оғузи тырконән һәни навконәни нин, әвонән һәни ҹо одәмин! Ај-һај бәчәвон ағыли! Кејнәку вағ дәгиш быә? Чәј пуст дәгиш бәзне бе, әвон пәсә пуст бәзнен танкарде, әмма чок-чоки дијә быкошон, ошко бәзнешон винде вағи чә пусти жијәдә! Вағи дыләдән рушт нибәбе бо толыши, ыми гушовә быкән ыштә гушонәдә! Мијонгәзәти, камфырсәтәти, номердәти, дыздәдәмәти чокнә чәвон мојәдә һестбе, есән һесте, ыми бызнән, һа чымы хосә хәлғ!
Чымы быјон ијән һовон! Русијә јолә довләте, јолә мәмләкәте. Аз жымәнә, урусон вејни чок фамедән ки, де Тыркијә ијән Озорбојҹони дустәти һежо һестыше дыглә сә: урусон һежо сәзукин, сәрвахт, сәрһисоб быәнинин дештә де мијоннангырә дустон нышт-әшт кардеәдә! Чумчыко, һежо чы урусон телә тәҹрубә сыбут кардедә ки, һәмон ә тыркә-оғузә дустон һар вахти һозын ки, чәху ежәнын бә урусон пешти! Әве, чәтин урус пешт быбасты бә тыркон. Ком урусән бы иддоәдә быбо, әв ја әвоме, сәш бешедәни сијосәтику, јаанки әвышон де пули бә даст сә тыркон! Вәссәлом, шуттәмом!
Охо урус чокнә јодо бәзне бекарде сори бәнав быә ҹо гылә фаҹиә: Охо бәвәдән тыркон жәшоне уруси ыштәнәпәр, осмонәдә кыштышоне чәј пилот! Чәвон жә һәмон јарә һәлә туш бастәныбе, ымһа, ижән әвон кыштышоне бы јоли сәфир! Һәмән ә пилотышон осмонәдә жәбе, сәфирышонән жәј пешто! Бәвәдән урусон һартәрәфә нез бедәбин де Тыркијә, есән де тови нез шедәбин бәвон! Чич бе чыми охој! Номердәти! Чы оғузә тыркон хунәдә быә номердәти!
Есән боән мығојисә быкәмон ым вағеон де ҹо гыләј фаҹиә. Јодәдәон бәбе, ды-се сор чыми бәнав чичыш карде озорбојҹони тыркә әфсәр Рамин Сәфәрови Маҹарыстонәдә? Хонәхы де тәвәш кыште ермәни әфсәр һытә вырәдә? Бә одәми бәвотен ки, жәго мердиш, димбәдим быманд де хонәхо, быжән әј! Не!!!!! Оғузи тырки һынә ни димбәдим одәм быжәны! Әв әнҹәх пешто бәзне жәј!
Чичышон карде Озорбојҹонәдә чыми мығобиләдә? Милли ғәһрәмонышон елон карде һәмон ә мыртәдә Сәфәров! Демијән ижән сыбут кардышоне ки, оғузә тыркон жәго хәлғин, жыго номердин, жыго камфырсәтин, жыго мијонгәзин, жыго дыздәдәмин! Ымони виндә, зынә толыш чокнә, де ком дими, де ком ғырјәти рози бәбе ки, толыш һежо нокә быбу бо тыркон? Жәго толыши коврә толыше! Жәләвон тыркисән јавә гыләј мәхлоғе, чәјсән јавә дышмене бо толыши!
Һәнијән нымунә бијәм бошмә? Бә јод бијән Спитаки бумәларзә. Бәгәм тыркон ныбин, ид кардедәбин, шоткомә кардедәбин ки, һәзо-һәзо одәмон тәләф бин бә вахти! Ҹо гыләј хәлғи ја мәмләкәти номи бәзнешон гәте ки, әвон жыго шојво быкән бә ҹо хәлғи фаҹиә? Чәтин пәјдо быкән жәго гыләј хәлғи! Иглә оғузи тырконин жәго беимонә, бехыдоә хәлғ!
Бәштә јод бијән апреләдә Хәрәбәоғәдә быә ҹанги. Чичышон карде тыркон? Кыштышоне дыглә бечизә пијәмерд, мысибәтонышон варде бәчәвон сә, чәјоән һәлә беар-беари шикилышон кәшәј! Ки быми бәвоте ҹанг? Ки бә жәләвони бәвоте мерд? Ҹанг жыго бедәни, һа бәшмә сә чавом! Мерд жәго бедәни, һа бәшмә ғыбон!
Әве, ижән вотедәм бәшмә: Тырк дәгиш әзыни бе, тырк һежо һәмон тырке ки, чандә сор чыми бәнав бәнә чәкуркә омәј певыло бе бәчәмә хосә зәмини! Әмә јодо бекомон ымони, вај бәчәмә һоли!
Чымы билон ијән һовон! Уруси сәфири кыште хәбә мәсеәдә, хун ру бе чымы дыло! Жыго сәрәседәм ки, ым хәбә бәшмәнән жәго тәсирыш кардә! Чумчыко нормал одәм һич ҹурә ашиш-ашиши ғәбул әзыни карде жәго мијонгәзә номердә әмәли!  Фәрғыш чиче, ки мандә чә ғәттоли пештәдә – сәудон ја әмерикәвыжон, Туркијә һукмәти ыштән ја чәвон озорбојҹоныжә быјон? Бомы әсос ыме ки, жәго әмәли бәзне карде әнҹәх тырк! Быдә чы Русијә елитә чок-чоки ыштә јодәдә огәты чымы вотәјон! Пешы ди бәбе! Ымруж урусон де һәвәси нымојиш кардовнедән тыркә сериалон ыштә телевизијәдә, тәблиғ кардедән мырдолә Османи идејон Русијәдә! Чы рәјрә урусон јодошон бекардә ки, чандә кәрә әвон ҹангышон карде де урусон, гәтымышон кардә урусә зәминон? Һәзо-һәзо урусә мердон тәләф быән бы ҹангонәдә! Јодо бәбе әвони бекарде? Әбынихо! Јодо бебәкан, и ружән бәвинден ки, тыркон ныштән чәвон сурфә сәдә, нокәшон кардә боштә урусон!
Интаси, чымы азизон, Русијә јолә довләте, урусон ыштән бәзнен, чәмә дард чәмә хәлғи дарде, чәмә кали дәмәрәсә толышони дарде! Әвон бәпе сәрәсын ки, тырк кије, чәј хәтоән чиче? Чәмә хәлғ бәпе сәрәсы ки, чанә ди ни, әмә чорә кардәнинимон боштә хәлғи, сохтәнинимон ыштә сәбәсожә довләти!
Охојәдә ымони вотедәм бәштә хәлғи: Нышт-әшт кардеәдә де оғузи тыркон, һоди быбән! Јодо бемәкән ки, әвон һежо чәху бәзнен ежәны бәшмә пешти! Чумчыко әвон жыго номердә хәлғин! Әвон сәфири пешто бә гуллә жә хәлғин, әвон пилоти осмонәдә жә хәлғин!
Сәломәт бымандән!
Быжијы чәмә хосә хәлғ!
Быжијы сәбәсожә Толышстон!
Быжијы Толышстони Милли телевизијә!
Лејла Додо

Источник: https://www.youtube.com/watch?v=ersLL-ggqMg

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>