«

»

Янв 09

Тыркә кинә Јереванәдә

Чымы азизә быјон ијән һовон!
Чымы ымружнә гәп, мәвужи, веј мәрағин бәбе бошмә. Чумчыко аз ымруж гәп бәжем бошмә гыләј ғејри-ади һодисә һәхәдә. Мәсәлә бымәдәј ки, гыләј озорбојҹоныжә тыркә мојнә бы незони шә бә Ермәнистони појтахт шәһр Јереван бәштә рәфиғә вәјә. Чә мојнә ном Назилә Меһдијевәје. Озорбојҹони сајтон нывыштедән ки, Назилә номинә стилисте, һәмән гыләј речинә кинәје. Феесбукәдә дијә быкошон бәчәј шикилон, ыштәнән шојд бәбешон быми.
Шымә парсе бәзнешон чымыку ки, чыми чич ғејри-ади ја әломәтдор гыләј һодисәје? Бымәдә чич һесте ки, гыләј тыркә кинә шә бә Јереван бә вәјә? Һа чич быбу чән? Лап чәмә чәшон рушин! Кејнәку кинон бәштә рәфиғә вәјә ше чочин быә! Шә, лап әҹәбыш кардә! Һәни бә вәјән нышо ә одәм, һәни бәчәј чичи рәфиғә бәбе воте?
Чымы азизон! Һәлбәттә, аз розим дешмә! Һич гылә фовғәлодә һодисә ни гыләј тыркә кинә бә Јереван бә вәјә шејәдә! Әмма иминә нәзәрәдә ым жыгоје! Тикәјән нығыл-нығыли фикир быкомон, бәвәдә бәзнемон ки, һәғиғәтән кали мәрағинә мәтләбон һестин бы мәсәләдә. Мәсәлә бымәдәј ки, нормал жимонәдә, бо нормал одәмон һич ғејри-ади гыләј чочинә мәсәлә ни ијо. Интаси боән ыштән быпарсәмон ыштәку: Бәгәм есә бәчәмә жијә жимони нормал бәбе воте? Гијәвәно быкомон бә гырдо-кәно, бәвиндемон ки, нифрәт ијән дышменәти һесте һар тәрәфәдә! Вист сорисә сапеје ки, Хәрәбоғи сәпе ҹанг шедә, озорбојҹоныжон бә ҹангин де ермәнијон. Жыго гыләј вахтәдә озорбојҹоныжә мојнә бә Ермәнистон ше, һәлбәттә, чочинә ијән мәрағинә мәсәләје!
Чымы азизон! Толыши Милли һәрәкоти һежо дастәкыш доә бә дыглә хәлғи дејәнды незки карде, һич ныбо фәрди сәвијјәдә. Әмә һежо бы фикирәдә быәмон, есән һежо бы фикирәдәмон ки, чы мәрәшулә де зуј һәлл карде вариантыш ни, әве әј һәлл бәбе карде иглә де сулһи, де гәпон рој! Тикәјән зијод быком, чәмә һәрәкоти јолон һәлә донзә сор чыми бәнав, Ды һәзо пенҹминә сори мајә мангәдә Јереванәдә дәвардә Иминә Бејнәлхәлғә толышшыносәти конфранси дәвардә ружонәдә бә ҹәми дынјо бәјонышон карде ки, Хәрәбоғи мәрәшулә һәлли игләлијә ро хәлғи дипломатијәје! Интаси бәвәдә Озорбојҹонәдә һар вырәо әштәкәси ыштә гәвомәјыш воте бәчәмә јолон ки, чәмә бы јоли “ғудрәтинә ијән мыдрикә” президентымон мандә вырәдә, толыш кије ки, әв Хәрәбоғи мәрәшулә һәлли варианти тәклиф быкә? Вотышоне ки, бәмә лозим ни хәлғи дипломатијә, әмә де зуј бәстемон Хәрәбоғи! Тосә есән сәјдән, әмма һич сәј зынедәнин! Нибәзненән!
Һәлә ыми нојдәм бә кәно, шымә јодәдәј ки, чәмә сипиришон бә конфрансәдә иштирок карде жыбызын гыләј гуллә бе, гыније бә Озорбојҹони һукмәти дыли сәј, кыштыше әв! Жыбызын ым сәфә гыләј бомбә бе, тыпәј Боку мијонәдә! Һар вырәо гәвбәгәв дошоне ки, һичмәсә, толышон хәјонәтышон кардә бә Озорбојҹони! Һар вырәо әштәкәси вотыше ки, “һәром быбу бәшмә Озорбојҹони нун”! Жыго бызын, Озорбојҹон нун дојдәбе бәвон ки, әв һәром быбу! Фаҹиә бымәдәбе ки, чәмә кали толышонән гәвбәгәв дошоне де пантыркон ијән Озорбојҹони мырдолә һукмәти, әвонән бәјонотонышон дој, һәни нымандә гәпонышон жәј бәчәмә сипиришон унвон! Ә толышонән вотышоне ки, һичмәсә, ә сипиришон хәјонәтышон кардә бә Озорбојҹони!
Һа чымы азизә хәлға! Ымијән бәшмә јод бијәм ки, жәго бәјонотон доә толышон кали гылон охој чок мәлуме бәшмә. Чәвон гыләјнишон кыште Озорбојҹони зиндонәдә, ә гыләјни пенҹ сор һыте зиндонәдә. Интаси боәмә воҹиб есә әвон нин. Вырәш омәј вотәјнә, пијәме шымәни и кәрән хәбәдо быкәм ки, ыштә хәлғи бә тыркон лынг-ләғы доәкәсон мыкофот һежо жәгоән бедә, бәбејән!
Есә чандә вахтонин Озорбојҹони һукмәтән, чәј шәһрвандонән гәдә-гәдә сәрәседән ки, нә Илһам Әлијеви ағыл ијән фам, нәән чәј ләшғәри зу вышкә ко ни Хәрәбоғи сәј! Әве одәмон ыштән гәдә-гәдә бә һәрәкәт омедән, дәмандедән бо ше-омә карде, дејәнды бо миж гәте.
Әве аз зинә гәпым жәј бы һәхәдә бочәмә ғурбинә Сипириши, пијәме умутым чәј нәзәри бы һәхәдә. Әв һежо мәсенҹән ки, һичмәсә тыркон гәдә-гәдә незки кардедән де ермәнијон, гәвипури сырәј, чәјо вотыше: “Гуш быдә бәмы, Лејла Додо, чиче, ты һәғиғәтән бовә кардедәш ки, ым просес тожә-тожә бино бедә? Не, чымы балә, бә тыркон де ермәнијон бәјәнды незки карде һич еһтијоҹ ни, чумчыко әвон һежо нез быән дејәнды, гирәм һәғиғәты зыне пиједәбу! Ты фик быдә, Русијәдә тыркон ијән ермәнијон вејни иҹо бизнес кардедән, ше-омә кардедән бәјәнды хәј-шәр, ресторанонәдә, кафејонәдә һежо иҹо бә һарды-һәшин, бәјәнды сәбәсәломәти пешомедән! Аз чандә жәго одәмоным виндә ки, ҹон вотедән, ҹон мәседән дејәнды! Ты жыго зынедәш ки, тыркон һежо есә омән бә Ермәнистон? Се-чо сор бәнав Озорбојҹони гыләј назир омәбе бә Јереван. Пиједәмни чәј номи бывотым, ғәдо-бәлош бәбе боәј! Ты виндәбәј, чокнә әв пешомедәбе ермәни конјаки, рахс кардедәбе де ермәнијон, дастбәгиј бедәбе дејәвон! Чәјоән ә назир де дастәј ермәни шин бә һәмон назири моәку быә ди, әјо әј зијорәтыш карде ыштә пыә-моә ғәбон!
Һәлә әј вотедәним ки, Русијәдә ијән ҹо мәмләкәтонәдә һәзо-һәзо умжәнә кәбинон һестин. Ышты јодо бешә, ды сор бәнав Озорбојҹони һукмәти јоли мыовин шәбе бә Казахстон бәштә быјәкинә вәјә? Бәкиш доәбе әј ыштә быјәкинә? Һәлбәттә, бә ермәнијә зоә! Бәс бә Озорбојҹони һукмәти назири кнә ијән ермәнијә тәләбә Лондонәдә быә вәјә чич вотедәш? Әве, чымы речинә балә, ым, тожә хәбә ни ермәнијон де тыркон һәхәдә! Әмма аз веј шом бы хәбә! Бәмы хош омедә, одәмон дејәнды дуст беәдә, ијәнды пијәдә! Зәһләм шедә нифрәтику, ғәм-ғуссәку!
-Әмма, Мамуле, — аз вотыме, — шымә вотәјку жыго бешедә ки, тыркон де ермәнијон дустәти бәзне бе, әмма толышон де ермәнијон һич гылә незкијәтику Озорбојҹонәдә сыханән әзыни бе?! Ышты вотәјбу, бәвәдә бочи шымә бә Ермәнистон оме жәго гыләј һај-куш рост карде Озорбојҹонәдә, бочи анә до-дымжонышон дој бәшмә?
-Мәсәлә мојән һежо бымәдәј, Лејла ханым, — ҹәвобыш дој Сипириши, — һежо азән бы һәхәдә гәп жәјдәм ладинәку боты. Жыго бешедә ки, бә тыркон бәбе де ермәнијон дустәти, хышәвандәти, әмма бә толышон нибәбе! Деми әвон пиједәшоне бывотын ки, толышон чәвон жидастин, чәвон ғаппозбәсән, әвон һарчи бәзнен карде, әмма толыши быпијоше гыләј ко быгәты, де гыләј ҹо кәси нышт-әшт быкә, бәвәдә әв иҹозә сәнине тырконку, чәвон һукмәтику! Дард бымәдәј, чымы Балә! Дард һәмән бымәдәј ки, чәмә кали толышон дәрәседәнин ыми! Ышты јодәдә бәбе чымы бә Иминә Толышшыносәти конфранс оме. Чичонышон һәни ныкарде әвон? Де чымы паспортышонән ләғв карде! Интаси аз һежо бәвәдән зынедәм ки, тыркон әнҹәх сыханәдә дышменин де ермәнијон, әмма чәвон әсыл дышмен толышонин!
Һа чымы азизона! Жыго зынедәм, вәсе һәни бә һәхәдә. Есән боән, идомә быкәм бошмә бә Јереван омә һәмон ә Назилә Меһдијевә һәхәдә ыштә гәпи. Чәј ҹигә рәсә ки, омә бәштә незә рәфиғә Гоһәр Аветисјани вәјә бә Јереван. Озорбојҹонәдә чәј думотоно гәп жәјәдә, әј ыштә гәвомә дымжононыш һәммәј доә бәвон! Бини, әв чич вотедә: “Һич нәзним ки, чымы бә вәјә оме жыго сәбәб бәбе бә һај-ку Озорбојҹонәдә ијән чәврәј ружномонәдә! Бәвон һәммәј чымы иглә ҹәвобым һесте: Аз әзним карде ки, нынывыштым ымони. Интаси бә одәми хото гынедә. Охо шымә тәһғир кардедәшон һәмән чымы хыјзони, чымы пыә-моә! Бәле, аз халисә озорбојҹони тырким! Интаси сәрәседәним ки, чы јолә гыном кардә бә Јереван шејәдә? Сијосәтмәдарон, вәрзышгорон бәзнен ше бә Јереван, сојә одәмон әзынин ше? Бочи бәс нывыштедәнишон чәвон бә Ермәнистон сәфә һәхәдә? Ашиш быныштән ыштә вырәдә, сирк бемәкән бомы, охо шымә и гәлә пәс нишон, одәмишон, меһрибон ебән бә одәмон, бә шыкырә мәбән сијосәтику! Ым чы гәпе жәјдәшон бомы? Ыштә умри быжијән! Бә коврә ше ја ныше чымы ыштә һәхе! Бошмә чич һесте ки, аз чуне шәм? Ым чымы рәфиғә вәјәје, чы фәрғыш һесте, әв ком милләтој? Тәки одәм ыштән чок быбу! Чиче, ә кинә сәше шымә зәминон? Бәлкәм әј кыштәше шымә сәрбозон? Сә быкән ым гәпон! Бәмә сакити лозиме, сулһ лозиме чәмә хәлғон арәдә. Вәсе, мыни нызне-нызне анә шәр-быһтонон воте бәчымы унвон! Ыштән баһандән ыштә нывыштәјон, бәлкәм ајбон бо бәштә! Аз бә Јереван шәм вотәјнә, бевәҹим, шымә чокишон? Шымә фик быдән, чы лырд-хәшәл емедә шымә гәвоно!”
-Интаси, бә нәзәр быстән, Лејла Додо, — ижән вотыше Сипириши, — бәштә јод бијә бәштә “ермәнијә һәхи гәрдәнкәш” вотә сеглә ноҹинси бә Боку ше. Охо чәј һич әлоғәш ни дечәмә хәлғон бәјәнды незки карде! Ым ҹо һәвоје, жәјдән тыркон! Озорбојҹони хысуси хыдмәти органон мәхсуси дәвәтышон кардәбе ыштә ҹәсусон бә Боку, — гыләј камсәрә мојнәбе, дыглән мелы-мәвуш, әвон Бокујәдә дошоне мәтбуот-конфрансон, мысоһибон, гыләј видеочәхән ношоне бә Јутуб, әјо мысоһибә дојдән бә Ғасымовә номәдә гыләј тыркә журналисти, пурышон карде виртуал мәкон дештә дәсу-песујон! Чымы шәкым ни ки, әвон чандә һәзо доллар харҹышон карде бы тәдбири, әмма чыми нәтиҹә чич бе? Дијәкә, чан кәси дијәш кардә бә видеочәхон? Ән веј дыса кәси! Чәвонән вејни јәғын ки тыркон ыштәнин, ермәнијон камин әјо! Есә винде, чуне шедән Озорбојҹони шәһрвандон бә будҹә доә анә пулон?, — озик омәј Сипириш.
Аз, һәлбәттә, мәләк һисоб кардедәним Ермәнистони һакимијәти сәдә ныштәкәсон, — идомәш карде әј. – Чымы зынәј ыме ки, постсәвети мәкони һич гылә һукмәт бегыно, бехәто ни. Әмма Бокујә, јәне чы гыно, һәроми, беһәхәти, һајбоштәнәти, һәркиһәрки, рышвәхорәти мәрәнгоәдә мәтбуоти конфранс доәкәсон ҹидди-ҹидди тәсдығ кардедән ки, мәвотбән иглә Ермәнистонәдә рышвә пегәтедән, мәвотбән, хәлғ сијо ружәдәјбән әјо! Охо ымони мәсеәдә, валлаһ, бә патә кагијән сырә омедә, чымы Балә! Лејла Додо, һәғиғәтән ты һисоб кардедәш ки, Ермәнистони хысуси хыдмәти органон әзынин бәнә бәвон боштә ҹәсус быгәтын тыркон дыләдә, әвони дәвәт быкән бә Јереван, жәго шәбеһ бекән ијо? Ышты һич шәкы ныбу, әвонән бәзнен ыми карде! Бәлкәмән, чәвонсән чок бәзнен карде! Һәмән чәвон һәнијән јолә һәхышон бәбе быми! Жәго ахмәхә ноҹинсон бәгәм камин тыркон дыләдә? Чанә пиједә, бәзнен пәјдо карде. Интаси ермәнијон ағылмандә хәлғин, әвон ыштән һәммәјсә чок зынедән ки, Озорбојҹон есә ком ружәдәј, чәј иғтысодијот, чәј хәлғи вәзјәт чы ружәдәј! Ермәнијон ахмәх нин, бовә быкән бәчәвон ду-тәлбисон!
Мылхәс, чымы азизон, чәмә Сипириши сәш карде ыштә сыхан, беше ше. Есә аз ныштәм, едјәсәм бә Назилә МЕһдијевә шикили, бәчәј речинә дими, бәчәј речинә андоми, чымы дыләдә гыләј јолә рәғбәт пелыведә бә мојнә! Аз жыго фикир кардедәм ки, ермәнијон де тыркон гирәм кејнәсә дуст быбон, бә жәләвонә мојнон һисоб дуст бәбен!
Сәломәт бымандән!
Быжијы чәмә хәлғ!
Быжијы сәбәсожә Толышстон!
Быжијы Толышстони Милли телевизијә!
Лејла Додо

Источник: https://www.youtube.com/watch?v=Kqqh8iCcixs&t=1808s

Добавить комментарий

Ваш e-mail не будет опубликован. Обязательные поля помечены *

Можно использовать следующие HTML-теги и атрибуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>